Art Week style.uz dan - Milliy liboslar festivali
Art Week Style.Uz ҳафталигинниг бешинчи куни Эски шаҳарнинг марказида жойлашган Миллий санъат маркази биносида Миллий либослар фестивали бўлиб ўтди. Мамлакатимизнинг 18 нафар дизайнерлари Ўзбекистоннинг турли ҳудудлари анъаналарига мувофиқ яратилган 16 та тўпламдаги юздан ортиқ миллий либосларини томошабинлар эътиборига ҳавола этдилар.Биринчи бўлиб Лали ўз дизайнерлик ишларини тақдим этди. Унинг тўплами бинафшаранг, оқ-қора, яшил, кўк, оқ рангдаги атлас ва адрас матоларидан яратилган узун енгли турли оқшом либосларидан ташкил топган. Ушбу тўпламдан ўзбек миллий анъаналарини ўзида акс эттирган дўппилар ҳам ўрин олган. Наталья Гармидер ўзининг миллийлик руҳи уфуриб турган мовий, зангори ва бинафшаранг туникалари билан томошабинларга куз ўртасида баҳорий кайфият улашди. Елена Мильбергернинг 1001 кеча эртаги руҳидаги безаклар билан ишланган тўқ рангли узун кўйлак ва рўмолларида шарқ аёлларига хос сирли гўзаллик яна бир бор ўз ифодасини топди. Мумтоз Қўзиева ўз тўпламини яратишда хон-атласнинг ёрқин рангларидан фойдаланган бўлса, Элянора Назарова яратган либосларда анор, хна ва ёнғоқнинг табиий, сокин рангларидаги кашталардан ўринли фойдаланилган. Анастасия Сафронова ёшлар учун сарафан, юбка ва топлар тўпламини яратишда беқасам миллий матосидан моҳирона фойдалана олган. Нафиса Шохўжаеванинг ялтироқ ипак матога миллий безаклардан фойдаланиб яратган анор, лола шаклидаги либослари ва Умида Мўминованинг олтин тусли нақшлар билан қопланган, духоба матосидан тайёрланган кўйлаклари тадбир меҳмонларини ҳайратга солди. Шунингдек, Елена Амированинг табиий ипак матосидан яратилган либослари намойишга сокин кайфият бағишлади.
Фурқат Абдураҳмонов, Наргиза Мансурова ва Зиёда Толиповаларнинг тўпламлари турли хил аксессуарлар: сумка, дўппи ва этиклар билан бойитилган. Фурқат Абдурахмонов ўз тўпламида хоразмча миллий бош кийим – чугурмадан фойдаланганлиги кўпчиликнинг эътиборини тортди. Миллий услубда жинси матосидан ишланган устки кийим ва шимлар Европа ва Осиё анъаналари уйғунлигида либос яратишнинг амалий кўриниши бўлди.
Динара Усмонова ва Нилуфар Юнусхўжаевалар миллий услубдаги тасмалар билан безатилган оч малла рангдаги плаш, нимча ва сумкаларни томошабинлар эътиборига ҳавола этишди. Денис Томилин атласдан ишланган устки кийимлари билан, Нилуфар Аҳмедова эса ишбилармон аёллар учун анъанавий кулранг тусдаги матолардан фойдаланиб французча услубда яратган замонавий либослар тўплами билан куз мавзусини давом эттиришди. Миллий либослар фестивали Art Week Style.Uz ҳафталигининг энг ёрқин намойишларидан бири бўлиб, ўзларини шарқона эртаклар оламида яна бир бор ҳис этиш учун меҳмонлар уни ҳар йили сабрсизлик билан кутишади.
|
